Ons is ryklik geseën met kundige ouers wat leiding gee by die skool wanneer projekte van stapel gestuur word. In die proses poog ons om die geld wat beskikbaar is, so effektief as moontlik volgens die behoeftes van ons leerders aan te wend.

In hierdie jaar is bykans 2400m² plaveisel gelê, waaronder die area aan die oostekant van die skool waar die ingang na die netbalbane is. Beligting van die hokkie-astro is verbeter, die personeelwoonstel by die koshuis is vergroot, ‘n snoepie vir tennis- en hokkiespelers is ingerig by die tennishuisie en drie spankamers vir senior sportspanne (rugby en hokkie) is gebou. Die krieketoefenarea se bouloppervlakte is ook ten volle opgeknap.

Projekte soos die beligting van ander sportvelde, plavei van paaie, instandhouding en uitbreiding van ons voertuigvloot, ‘n ekstra klaskamer, ‘n afdak tussen die saal en administratiewe gebou, ‘n ekstra stel trappe vir die rekenaarlokale, spankamers vir die netbalspelers en trompoppies en addisionele voertuigafdakke word beplan vir 2017 / 2018.