KULTUUR

ATKV-Redenaars

Aan die ATKV-redenaarskompetisie het agt juniors en elf seniors deelgeneem. Twee juniors en vyf seniors dring deur na die provinsiale rondte.

JF het vanjaar die Oppie-tong-af-kompetisie aangebied en by hierdie kompetisie behaal die leerders vyf A-simbole en twee B+-simbole.

ATKV-Debat

 In die eerste ronde van die ATKV-debatkompetisie neem drie junior- en ses seniorspanne deel.

Volksblad Dink-of-Sinkkompetisie

Vanjaar het die skool met vier spanne aan die jaarlikse Volksblad Dink-of-Sink-debat deelgeneem.

ATKV-Jeugtak (Taalindoenas)

Die ATKV-Jeugtak se oogmerk is om Afrikaans deur middel van verskeie aksies te bevorder. Vanjaar ondersteun die tak VivA Afrikaans se Varsgebek Sêgoed en Kykgoed-kompetisie. Die lede van hierdie tak het ook ondersteuning gebied tydens ‘n plaaslike opvoering van ‘n ATKV-tienertoneelgroep. Verder het die Jeugtak aan ‘n boeresportkompetisie by die Voedi-dag ten bate van Huis Athalia deelgeneem waar hulle as medewenners van die Boeresport Wisseltrofee weggestap het.

Spelkompetisies

Wow-Spelkompetisie

Die WOW-spelkompetisie (Woorde Open Wêrelde) is ‘n inisiatief van die Universiteit Stellenbosch. Die doel is om leerders aan te moedig om speel-speel te leer spel. Twee van JF se leerders het na die provinsiale rondte deurgedring en een leerder gaan aan die nasionale rondte in Stellenbosch deelneem.

ATKV Spelathon

Twee graad 10-leerders neem aan hierdie kompetisie deel.

Voortrekkers

Die Voortrekkers se tema was dié jaar “Voortrekkers kan.”

2017 het afgeskop met 90 jeuglede en 35 volwasse lede, wat ons vir die vyfde agtereenvolgende jaar die grootste hoërskoolgroep in die Vrystaat en in die land maak.

Drie graad 12-lede is dié jaar ingeskryf vir die Presidentsverkenner teoretiese vraestel en al drie het geslaag. Hulle is genooi na die Presidentsverkennerkamp waar al drie dié titel verwerf het.

Christiaan Minnie in graad 11 is ook verkies tot Vrystaat Jeugleier en nasionale Jeugleier.

Aktiwiteite wat in 2017 plaasgevind het:

Die jaarlikse vlotkamp.

  •  Die gebiedskamp te Doornkloof.
  •  ‘n Proeaand en kunsuitstalling.
  •  Die bekendstelling van ‘n nuwe Voortrekker-kookboek.
  •  ‘n Jeugberaad te Doornkloof.
  •  ‘n Kommando familiekamp (kwartaal 4)
  •  ‘n Seejolkamp te Hartenbos.

Kentekens wat verwerf is:

  •  Waterredding en touwerk.
  •  Vuurwapens en vliegkuns.
  •  Selfverdediging en elektronika.

Skryfprestasies

Poort-publikasie: Christiaan Minnie publiseer vanjaar in Poort en word ook na die poësie-werkswinkel by die Vrystaat Kunstefees genooi omdat sy werk onder die tien bestes gekeur is.

Afrikaans Internasionale Ekspo: Drie goue sertifikate vir poësie en drie silwer sertifikate (twee vir poësie en een vir ‘n opstel) word verwerf.

Ander kompetisies waaraan deelgeneem is, is die ATKV-kuierkompetisie en Oranje Meisieskool se gedigtekompetisie.

Skoolkoerant

Onder leiding van ‘n hoof- en subredakteur het die redaksie (bestaande uit 30 joernaliste en vier fotograwe) twee koerante uitgegee. Jim Fouché het hierdie jaar ook by Netwerk 24 se digitale platform vir skoolkoerante (WeCan24 / OnsKan24) aangesluit en meer as 60 berigte is op hierdie platform gepubliseer. WeCan 24 kan op Facebook gevolg word en so kan lesers toegang tot hierdie berigte verkry.

Daar was vanjaar ook ‘n Nasionale Skoolkoerantkompetisie en Die Oester het derde in die Vrystaat en sewende nasionaal geëindig.

JF-Kunste Akademie

Hierdie is die vierde jaar wat die Kunste-Akademie op die been is. Vanjaar is 108 studente deel van die akademie. Ons is in die bevoorregte posisie dat me. Christi-Ann Lombard, me. Isabel Malan, mnr. Lourie Coetzee en Creare deel vorm van ons span.

Ons het puik prestasies by die kunswedstryd behaal, met die meeste deelname nog ooit.

Bellissima

Bellissima het hierdie jaar geskiedenis gemaak. Vir die eerste keer in die bestaan van Bellissima het hulle ‘n verhoogproduksie, wat beide sang en drama insluit, op die planke gebring. Hulle het gesorg vir komiese vermaak en het die mense vasgenael gehad. Ons glo en vertrou dat hierdie ‘n nuwe Bellissima-tradisie sal word.

Voci Potenti

Voci Potenti het hierdie jaar aan die kunswedstryd deelgeneem en het hulself terdeë geniet. Ons het vir die eerste keer ‘n toekenning gegee aan die toegewydste leerders in die groep. Corné Beyers met sy uitsonderlike musikaliteit en Christiaan Minnie met sy vermaaklikheidstalent het die toekenning gedeel.